QPPO HANDA NA SA HALALAN 2016

Simula pa noong ika-10 ng Enero ng simulan ang ipinatutupad na COMELEC Checkpoint  at Gun Ban sa bansa, handa na ang mga kapulisan para sa nalalapit na halalan.

Kung saan nasa humigit isang milyon, ang mga rehistradong botante sa probinsiya ng Quezon.

Tinatayang nasa 1,115 ang Voting Centers dito, na may 8,479 na Voting Precinct at 7,977 na clustered precinct.

Nasa 1,235 naman ang mga Local Political Candidates, kung saan, 6 ang tumakbo sa pagka-gobernador, 3 sa Vice-Governor, 30 sa Board Member, at 14 sa pagka-Congressman. Habang nasa 120 sa pagka-Mayor, 109 sa pagka-Vice Mayor, at 953 sa Councilor.

Sa panahon ng eleksyon hindi maiiwasan ang pagkakaroon ng hindi inaasahang pangyayari, kaya naman may hinanda nang CONTINGENCY PLAN ang Quezon Police Provincial Office o QPPO.

Ilan nga sa mga aktibidad na ito ay ang Casting of Votes, Delivery and Recovery of election paraphernalia’s & VCM, Political Rally, Proclamation of Candidates at Campaign Period.

Dito maaaring magkaroon ng Fire Incident , Harrassment or Shooting of leftist and armed supporters, Provincial wide blackout, Hi-jacking ng VCM’s, Bomb threat or Explosion, Rumored election cheating and manipulation at Food Poisoning na maaaring magdulot ng panic, injury, damage to property at iba pa.

Kaya naman patuloy ang mga aktibidad ng mga kapulisan para sa SAFE 2016 sa ilalim ng Acting Provincial Director ng Quezon na si PSSupt Eugene B Paguirigan. 

JEN-JEN OBLEFIAS

NATIONAL ZERO WASTE CONSCIOUSNESS MONTH, SUPORTADO NG BAYAN NG SARIAYA QUEZON

Ang buwan ng Enero kada taon ay idineklarang “Zero Waste Month.” Kaya naman bilang suporta at pakikiisa ng bayan ng Sariaya sa selebrasyon ng National Zero Waste Consciousness Month Proclamation No. 760, nagkaroon ng signing of Manifesto of Commitment na isinagawa sa Sariaya Sports Complex noong Lunes.

Ito ay pinangunahan ng Zero Waste Management Branch ng Sariaya LGU, sa pangunguna ni Mr. Louie Masilang, naandon din ang kapulisan, mga volunteers at iba pa. 

At bilang pakikiisa ng publiko upang maprotektahan ang kalikasan, suportado sa bayang ito ang Ecological Waste Management Programs, na nakapaloob sa Republic Act No. 9003 o Ecological Solid Waste Management Act of 2000 at ang Kautusang Pambayan 2011-05, kung saan simula nga noong Aug. 1, 2012 ay mahigpit nang ipinagbawal ang paggamit ng plastic at Styrofoam.

Hinikayat ang mga mamamayan na gumamit ng maka-Kalikasan na lalagyan tulad ng bayong, basket, reusable container at iba pang kauri nito, maging ang paghihiwalay ng mga basurang nabubulok at hindi nabubulok.

Samantala, noong araw ding yon nagsagawa ng removal of tape on muzzle of firearms o pagtatanggal ng busal, sa dulo ng baril, ng mga miyembro ng Sariaya Municipal Police Station.

JEN-JEN OBLEFIAS

LALAKING NAGBEBENTA NG DROGA, ARESTADO!

Isang lalaki ang naaresto sa isinagawang buy bust operation sa Sitio Centro, Brgy. Bignay 1, Sariaya Quezon.

Habang ito ay nasa akto ng pagbebenta ng isang transparent plastic sachet, na naglalaman ng pinaghihinalaang shabu sa isang confidential informant na umaktong poseur buyer, kapalit ng tatlong (3) piraso ng isandaang piso na ginamit bilang marked money.

Nasa humigit kumulang .15 grams ng droga na may market value na Php 300.00 ang nakumpiska sa suspek, na nakilalang si Reymark Umilda Buela @Macmac, 24 anyos at residente ng nabanggit  na lugar.

Ang nakumpiskang ebidensya ay dadalhin sa QPCLO, Camp Nakar, Lucena City, para sa laboratory examination, habang ang suspek ay nahaharap sa kasong Violation of Sec. 5, Art. II ng RA 9165.

JEN-JEN OBLEFIAS

PAGBUBUKAS NG CHRISTMAS LIGHT SA MUNICIPYO MAAGANG PAMASKO SA MGA SARIAYAHIN

Kahit saan nga ay makikita na ang mga palamuti at nagniningningang ilaw pagsapit ng gabi, palatandaan ng paparating na kapaskuhan.

Sa bayan ng Sariaya sinimulan na ang pagpapailaw ng Christmas light ng Munisipyo at Parke noong Lunes, sa pangunguna ng punong bayan na si Mayor Rosauro “Boyet” Masilang, kasama ang Sariaya Tourism Council, mga empleyado ng Lokal na Pamahalaan, Konsehal, Kapitan, Kapulisan at marami pang iba.

Kasabay ng pagpapalit-palit ng ilaw, ang mga awiting pamasko na kinagiliwan ng mga nanonood.

Ayon sa mga sariayahin, ito ay maagang pamasko sa kanila, kung saan pag sapit ng dilim at sinimulan ng buksan ang mga ilaw na nagiging atraksyon hindi lamang ng mga tao dito kundi maging ng mga dumadayo sa kanilang bayan ay nagiging masayang pasyalan ang parke na nasa harapan ng munisipyo.

Ilan rin ang nagsabi na wala naman silang pangdekorasyong Christmas Tree at Christmas light, maging ng panghanda, kaya naman upang maging maganda at masaya sila ngayong Christmas season ay dadalhin na lamang nila ang kanilang pamilya dito.

Hindi bale na umanong walang pera, basta sama-sama at buo ang pamilya.   

JEN-JEN OBLEFIAS

MAGSASAKANG PUSHER TIMBOG SA SARIAYA

Isang magsasakang tulak ang naaresto kamakailan sa Brgy. Bignay 2, Sariaya Quezon, matapos magsagawa ng isang buy-bust operation ang kapulisan sa pamumuno ni PSI Fernando Reyes III.

Nakilala ang suspek na si Felix Braza Rivera @Felix (42 anyos, may asawa at residente ng Sitio Tabag ng nabanggit na lugar).

Nahuli ito sa akto ng pagbebenta ng shabu sa isang confidential informant kapalit ng isang piraso ng P500 bill bilang marked money habang narekober naman ang 2 piraso ng selyadong transparent plastic sachet na naglalaman ng hinihinalang droga na humigit kumulang 1.66 grams na may estimated market value na ₱2,500 at tatlong piraso ng selyadong plastic sachet na naglalaman naman ng pinaghihinalaang dried marijuana leaves na humigit kumulang 1.77 grams at nagkakahalaga ng nasa humigit kumulang P100.

Nakuha din ang P500 na ginamit bilang marked money at mga assorted drug paraphernalia.

Dahil dito nahaharap sa kasong paglabag sa RA 9165 o Comprehensive Dangerous Drugs Act ang suspek.

JEN-JEN OBLEFIAS

SARIAYA PULIS WALANG INUURUNGANG KRIMEN

Bukod sa pagpapaigting ng kampanya ng kapulisan, laban sa iligal na droga at “Drug Free Family Program” sa bayan ng Sariaya, ang seven major crimes  of concern, ng lambat sibat,  kasama na ang theft,  ay isa lamang sa mga kaso na tinututukan ng Sariaya Municipal Police Station.

At bukod sa pagpapatrolya sa mga lansangan ng poblacion, nagbigay din ng direktiba si Police Supt Harold P Depositar, ang Chief of Police ng Sariaya MPS, sa kanyang mga tauhan, na bukod sa kalsada ay pumasok din sa mga area o barangay, upang kamustahin ang sitwasyon doon.

Sa kaso naman ng sinasabing nakawan ng kable, sinabi niya na “yung report na mga nakawan ng kable, walang nakakarating sa aking kaalaman, kasi every week may lambat sibat kami kasama yan theft yan” aniya.

Ganon pa man, hinihiling ng kapulisan ang koordenasyon o kooperasyon ng bawat mamamayan na mag-report sa kanila, kahit petty crimes lang na nangyayari sa kanilang barangay, lalo na nga at sila ang biktima dahil maliit man o malaking krimen, hindi nila ito palalampasin.

JEN-JEN OBLEFIAS

MGA PUNONG BARANGAY, SUPORTADO ANG DRUG FREE FAMILY PROGRAM SA BAYAN NG SARIAYA

Naging positibo nga ang resulta ng mga isinasagawang buy-bust operation ng mga elemento ng Sariaya Municipal Police Station, kung saan nahuhuli ang mga gumagamit at tulak ng droga sa bayan ng Sariaya.

Bunsod ito ng pinalakas na kampanya laban sa iligal na droga at ng “Drug Free Family Program” ng MADAC o Municipal Anti-Drug Abuse Council at BADAC o Brgy. Anti-Drug Abuse Council, sa pangunguna ng mga kapitan ng mga barangay.

Ayon sa mga nakapanayam natin na punong barangay, ang programang ito ay lubos nilang sinusuportahan.  Bukod kasi sa pagiging ama ng kanilang nasasakupan ay magulang din sila, na mayroong anak na nais nilang protektahan at maiiwas sa ipinagbabawal na gamot.

Batid nila ang masamang epekto nito, kung saan nagiging suki na rin ang mga kabataan at nasasangkot sa iba’t ibang klase ng krimen na nagagawa dahil sa drugs addiction.

Ilan rin sa mga hakbangin na kanilang ginagawa ay ang pakikipag-ugnayan sa mga magulang, pagtutok sa mga aktibidad ng barangay, lalo na yung may kinalaman sa interest ng kabataan tulad ng sports at marami pang iba.

Sa ganitong paraan naipapakita umano nila ang malaking suporta sa nasabing programa kontra droga.

JEN-JEN OBLEFIAS

LALAKI ARESTADO HABANG NAGBEBENTA NG DROGA SA BRGY. SAN ROQUE, SARIAYA QUEZON

Arestado ang isang lalaki sa isinagawang buy bust operation sa Brgy. San Roque, Sariaya Quezon, dakong ala-1:40 ng hapon kamakalawa. 

Sa pinagsanib na pwersa ng Sariaya Municipal Police Station, sa pangunguna ni PSI Fernando Reyes III kasama ang Anti-Organized Crime Task Force at Provincial Anti-Illegal Drugs Special Operations Task Group na kinabibilangan nina 2Lt. Eryl Roberts, Staff Sergeant (SSG) Robert Muyco, Civil Affairs (CA) Aloysius Recio, P03 Wilfredo Melina, P02 Jimmy Autida at P01 Erick John Quejano.

Ang suspek ay nakilalang si Marvin Austria Mayuga, 25 anyos na residente ng Sitio Banlikan ng nabanggit na lugar, nahuli ito sa aktong pagbebenta ng isang sachet, na naglalaman ng pinaghihinalang shabu sa isang civilian poseur buyer, kapalit ng tatlong piraso ng one hundred peso bill (P100.00) na ginamit bilang marked money.

Sa nasabing operasyon nakumpiska sa suspek ang nabanggit na marked money habang narekober naman sa civilian poseur buyer ang sachet ng pinaghihinalaang shabu na tumitimbang ng 0.08 grams na may estimated market value na ₱900.

Kasalukuyang nakakulong si Mayuga sa Sariaya MPS Custodial Facility habang nahaharap sa kasong Violation of Section 5, Article II ng RA 9165. Habang ang nakumpiskang ebidensiya ay dinala sa (QPCLO) Quezon Provincial Crime Laboratory Office sa Camp Nakar, Lucena City para sa Laboratory Examination.

JEN-JEN OBLEFIAS

IBA’T IBANG PAMAMARAAN SA PAGPAPANATILI NG PEACE AND ORDER SA BAYAN NG SARIAYA, REGULAR NA ISINASAGAWA NG KAPULISAN

Bukod sa positibong resulta ng OPLAN-Lambat Sibat ng Quezon Provincial Police Office (QPPO) at buy-bust operation sa bayan ng Sariaya, patuloy rin ang dayalogo sa iba't ibang sektor lalo na sa mga kabataan tungkol sa Drug's Awareness Campaign.

May beat patrol kung saan naglalakad ang mga miyembro ng kapulisan at namimigay ng mga babasahin (flyers) tungkol sa Tanong at Sagot ukol sa Batas Pambansa Blg. 9262, kung saan ito ay tungkol sa batas, laban sa karahasan sa kababaihan at sa kanilang mga anak.

Kasama dito ang mga Tips para makaiwas sa iba't ibang krimen gaya ng holdap, robbery, motor napping, car napping at iba pa.

Nagsasagawa rin ng Police Assistance sa Ugnayan sa Barangay na pinangungunahan ng Lokal na Pamahalaan, kung saan nagi-issue rin ng police clearance ng walang bayad ang Sariaya Municipal Police Station.

Ito rin ang pagkakataon kung saan idini-discuss ng kapulisan sa mga tao dito ang Peace and Orderliness, Crime Prevention Tips, Revitalized Campaign ng PNP laban sa iligal na droga at ang programa ng Municipal Anti-Drug Abuse Council (MADAC) at Barangay Anti-Drug Abuse Council (BADAC) na tinatawag na "Drug Free Family" kung saan kapag napatunayan na ang isang pamilya ay walang gumagamit ng drugs, bibigyan sila ng sticker at ididikit sa kanilang bahay na nagpapatunay na walang User at Pusher doon. 

JEN-JEN OBLEFIAS

LALAKI ARESTADO SA PAGBEBENTA NG DROGA SA SARIAYA

Arestado ang isang lalaki sa isinagawang buy-bust operation sa Sitio Manggahan ng Brgy. Janagdong 1, Sariaya Quezon, matapos itong mahuli, sa akto ng pagbebenta ng isang sachet na naglalaman ng pinaghihinalaang shabu, kapalit ang isang piraso ng P500 pesos bill, bilang marked money.

Narekober at nakumpiska ang 6 na piraso ng plastic sachet na naglalaman ng pinaghihinalaang iligal na droga na tumitimbang ng 0.88 grams at may estimated amount market value na P10,300, 4 na piraso ng Identification Cards gaya ng BIR, SSS, COMELEC at PhilHealth, isang pirasong body bag na kulay green at yellow, bench wallet na kulay brown, P7,350 cash money sa iba’t ibang denomination na pinaghihinalaang gamit sa transaksyon at isang kahon ng posporo.

Nakilala ang suspek na si Jomart Arandia Adivino @Pugoy/Togoy (34 years old, may live-in partner at tubong Bayanan Muntinlupa City na kasalukuyang naninirahan sa Sariaya.

Nakadetine na ito sa Sariaya Municipal Police Station at nahaharap sa kasong Violation of Section 5 and 11, Article II ng RA 9165 o mas kilalang Comprehensive Dangerous Drugs Act.

JEN-JEN OBLEFIAS

MGA PROYEKTO AT PROGRAMANG PANG-EDUKASYON SUPORTADO NG LOKAL NA PAMAHALAAN NG SARIAYA QUEZON

Isa sa pinahahalagahan ng Lokal na Pamahalaan ng Sariaya ang Edukasyon, ito ay sa paniniwala na ang kinabukasan ng bayan ay nakasalalay sa kung paano hinuhubog ang mga anak ng kanilang mga magulang, kaya naman maraming proyekto at programang pang-Edukasyon ang isinasagawa ngayon sa ilalim ng pamumuno ni Mayor Rosauro “Boyet” V. Masilang, upang mapataas ang kalidad nito.

May tinatawag na School Empowerment Fund na nakalaan dito para sa repair at maintenance ng school facilities na may halagang umaabot sa P1,250,000.00 na ibinabahagi ng pantay-pantay sa lahat ng mga pampublikong elementarya at high schools.

Meron ring ALS o Aid to Alternative Learning System para sa gustong mag-aral kahit may edad na, mula sa P 150,000.00 ay pinalaki ito sa halagang umaabot sa P 782,000.00 annually.

Para naman sa mga estudyanteng kalahok sa mga kumpetisyong pang-akademiko ay nagkaroon naman ng Pupil Academic Development Fund. Bukod sa mga ito may malaking bahagi din ng pondo na ginugugol sa training sa pagpapa-unlad ng kakayahan ng mga guro gaya ng Lakbay-Aral.

Pinaglaanan rin ng milyong pondo ang Locally Funded Teacher (LFT) na karaniwan na ang sweldo lamang ay umaabot ng tatlo hanggang limang libong piso (P5,000), subalit ang LFT sa Sariaya ay sumusweldo ng P10,000 kada buwan na siyang pinaka malaki sa buong 2nd District ng Quezon.

JEN-JEN OBLEFIAS

DALAWANG KOLEKTOR NG STL BOOKIES SA SARIAYA, ARESTADO !

Sa patuloy na pagbabantay ng Sariaya Municipal Police Station sa krimen at pagpapanatili ng Peace and Order sa Bayan ng Sariaya Quezon, bukod sa droga mahigpit ding binabantayan ang iba’t ibang klase ng iligal na sugal.

Katuwang ng istasyong nabanggit ang Quezon-CIDG na pinamumunuan ni PCI Danilo F Balmes, kung saan sa huling araw ng setyembre ay nagkaroon ito ng positibong resulta.

Dalawang bookies collector ang arestado sa Brgy. Manggalang Bantilan ng bayang nabanggit, nauna na dito ang isang Alvin Salcedo La Torre (29 years old) na residente ng Sitio Talipapa, habang nangongolekta ng pusta o taya sa STL. 

Nakuha dito ang sampung (10) piraso ng lastillas na may mga nakasulat na numero, isang piraso ng itim na bolpen at halagang Php. 1,655.00 (bet money) sa iba’t ibang denominasyon.

Sinundan ng pagkakadakip sa isa pang kolektor na nakilalang si Joel Abanilla Adan (32 years old), sa Sitio Palitid ng nabanggit ring barangay. 

Narekober dito ang siyam (9) na piraso ng lastillas na may nakasulat na mga numero, itim na bolpen at bet money na nagkakahalaga ng Php. 1,410.00.

Kapwa nakakulong ang dalawa sa Quezon CIDG Custodial Facility Center sa Lucena City at nahaharap sa kasong Violation of RA 9287 (STL Bookies).

                                                                                                                JEN-JEN OBLEFIAS

SUNDALO PATAY MATAPOS MAAKSIDENTE SA DAAN

Agad binawian ng buhay ang isang Enlisted Personnel Army, na nakilalang si Cpl Leonardo Abrogena Dacanay (33 years old) ng 2^nd  Infantry Division (2ID) at residente ng Brgy. Dalahican, Lucena City, matapos itong maaksidente sakay ng isang Suzuki Raider 150 Motorcycle na walang plaka.

Dakong alas-9:30 kagabi ng madaanan ng 97.5 Radio City News Correspondent (Jen-jen) kasama ang dalawang miyembro ng Kabalikat Civicom (999) Sariaya Chapter, ang kahabaan ng Diversion Road na bumabagtas patungong Lucena City sakay ng 2 motorsiklo, ng mapansin sa gawing kanan ng kalsada ang ilang mga tao na animo’y nagtatrapik at naglagay ng ilang harang sa road lane na pasilangan.

Sa dulo ay nakita na nga ang biktimang duguan kung saan ito ay nakadapa sa tabing kalsada at sa ilang hakbang lang ay ang isang nakatumbang motorsiklo.

Ayon sa ilang saksi hindi nila umano masyado nakita ang pangyayari dahil sa sobrang dilim ng lugar na nasa bahagi ng Brgy. Mayuwi, Tayabas City, sa pag-uusisa ay napansin ng ilan, na tao ito at agad naman naglagay ng ilang harang upang hindi na ito masagasaan ng mga dumaraang sasakyan.

Nagtanong ang isa sa mga miyembro ng Kabalikat sa mga nandon kung may humingi na ng police assistance at agad na tinungo ang Police Checkpoint na nasa bahagi ng Brgy. Calumpang, sa pagbalik ay kasama na nito ang isang miyembro ng Tayabas Municipal Police Station na si PO3 Rommel Santos.

Samantala ayon sa isa pang tagaroon na ating nakausap, hinabol umano niya ang nakabanggang truck gamit ang motor hanggang sa Calumpang patungong Sariaya Quezon, muntik na umanong maaksidente ang naturang lalaki dahil sa nagpatay ng ilaw ang driver ng truck, buti na lamang umano ay kaagad siyang nakapag-preno, at nagpasalamat siya at  agad namang naharang ito ng kapulisan. Kapwa patungo sa direksyon ng Lucena ang dalawang sangkot na sasakyan ng maganap ang aksidente.

Kinilala ang suspek at driver na si Eugenio Braulio Montoya (54 years old) at residente ng Masalukot 1, Candelaria Quezon, napag-alaman na ang minamaneho nitong sasakyan na Mitsubishi-Fuso Truck na may plate number CSD 663, na nakahagip sa nagmomotor na biktima ay nakarehistro sa isang Manuel C. Licup.

Ang mga labi ng biktima ay nasa Funeraria Pagbilao, Lucena City habang ang suspek ay nasa kustodiya ng Tayabas Police Station.

 Jen-jen Oblefias

MAGSASAKANG WALANG HELMET ARESTADO

Isang magsasaka na nakilalang si Arnel Tagodin Manalo ng Brgy. Lutucan 1, ang nasakote sa isinagawang Checkpoint kaugnay ng Oplan Sita ng Sariaya Municipal Police Station sa pangunguna ni PSI Fernando Cueto Reyes III.

Sakay ito ng isang itim na Honda motorcycle na may plakang DA 43307 ng sitahin ito sa checkpoint dahil sa pagmamaneho ng walang helmet, napag-alaman din na wala itong driver’s license at ng isinailalim ito sa body search ay nakuha sa pag-iingat nito ang isang kalibre 38 Colt (Paltik) na revolver na may serial number 54645 at naglalaman ng 3 bala sa chamber nito.

Matapos na walang maipakitang kaukulang dokumento ay dinakip ito ng mga pulis at nahaharap sa kasong paglabag sa RA 10591 o ang “Comprehensive FAs and Ammunition Regulation Act”.

Reported by: Jen-jen Oblefias

TINDERO NG MANGA ARESTADO DAHIL SA DROGA

Sariaya Quezon - Arestado ang isang lalaki na tulak ng droga sa isang buy-bust operation ng Sariaya Municipal Police Station sa pakikipagtulungan sa PDEA4A na isinagawa sa Brgy.Gibanga, kamakailan.

Nakilala ang lalaki na si Erwin Galvez Villarba, 38 years old, may asawa, tindero ng manga at residente ng naturang barangay, nakumpiska sa suspek ang isang piraso ng Five hundred Peso (P500.00) na ginamit bilang marked money, habang ang selyadong sachet na pinaghihinalaang shabu na binili ng isang civilian poseur buyer (intel) ay narekober din.

Nahaharap sa kasong Violation of Sec. 5, Article II of RA 9165 ang suspek, habang ang pinaghihinalaang shabu na nakuha ay naipadala na sa Quezon Provincial Crime Laboratory, sa Lucena City para sa laboratory examination.

Reported by: Jen-jen Oblefias

CANDELARIAHING PINOY SINGING IDOL MAY KASUNOD NA EDITION

Candelaria Quezon - "Candelariahing Pinoy Medal"

Dahil sa matagumpay na Launching ng Candelariahing Pinoy Singing Idol 2015 - Teen Edition, muling pinagpaplanuhan ng Lokal na pamahalaan ng Candelaria Quezon, sa pamumuno ni Mayor Ferdinand R. Maliwanag ang susunod na edition nito.

Ginanap ito noong ika-25 ng Mayo taong kasalukuyan sa Plaza Narra na nasa loob ng Municipal Compound dito.

Ayon kay Arlyn O. Manlulu, Event Management Officer ng Serbisyong Candelariahing Pinoy, ito ang kauna-unahang pagkakataon na sinubukan nila ito upang maka-discover ng Local Talent na masasabing sariling atin (Candelariahin).

Layunin nito na malinang pa sa mas mature at magaling na singer gaya ng ilang mga matatagumpay na talent mula sa iba’t ibang probinsiya ang mga nasa edad 10 years old hanggang 14 years old na kabataan sa kanilang bayan, na maaaring mag-guest sa TV Station, na magsasabing “Ako ay Proud na Candelariahing Pinoy”.

Dagdag pa ni Manlulu, ito ay dapat isang simpleng contest lamang, “trial and error lang” ngunit sa paglipas ng mga araw nagkaroon ng progress sa mga plano, kaya naging TV Production ang nangyari, kung saan may workshop na parang “The Voice”. 

Iba ito sa ilang mga singing contest sa labas, ayon sa Event Coordinator ng Special Activities na si Mr. Noel Angelito Rigos, “Kasi very successful yung launching, kasi actually yun ay first ever, na magkaroon ng Title na Candelariahing Pinoy Singing Idol”. na sinang-ayunan din ni Mr. Erickh C. Ona, ang Supervising Admin. Officer ng naturang Special Project, dahil sa tagumpay nito.

Yung essence ng competition ay inalis bagkus isang magandang production o palabas ang nangyari at habang nago-audition ang mga bata ay hinanapan din nila ito ng iba pang skills kung saan may mga magaling tumugtog ng gitara, magaling magsayaw at iba pa.

Ibinili rin nila ang mga bata ng damit, bukod pa sa workshop o pagtraining nila sa mga ito kung paano mag-perform.

Sa 22 finalist, lima (5) ang nanalo, kung saan nakatanggap sila ng Achievement Certificate at Candelariahing Pinoy Medal.

Tinanghal na Grand Winner ang 10 taong gulang na si Marianne Denice Matugas ng Brgy. Malabanban Sur, na tumanggap ng Plaque, Musical Scholarship Award, Medal at Cash Prize na P15,000.

1^st Runner Up naman si Karl Angelo Gutana, 12 yrs. old ng Mangilag Sur na tumanggap ng P12,000.  2^nd Runner Up ang batang 14 yrs. old na si Regie de Luna, ng Brgy. Masalukot V na nabigyan ng P10,000.

Samantala 3^rd Runner Up si Ivy Martinez (13 yrs. old) ng Brgy. Pahinga Norte na may P8,000 at 4^th Runner Up naman ang taga Old Buenavista West na si Joanna Marie Urbano, 13 yrs. Old at nag-uwi ng P5,000, ang mga hindi naman pinalad ay may Consolation Prize na P1,000.

Aabangan naman ang susunod na edition na mangyayari matapos ang matagumpay na Special Project na ito ng Lokal na pamahalaan ng Candelaria Quezon.

Reported by: JEN-JEN OBLEFIAS

BENEPISYO PARA SA MGA SENIOR CITIZENS SA SARIAYA QUEZON NAGPAPATULOY

Sariaya OSCA President - Gng. Luisita P. Rena with her husband.

Dahil sa paglago ng ekonomiya ng bansa nagkaroon ng reporma ang gobyerno, na dapat makinabang ang bata at matatanda bilang bahagi ng kaunlarang panlahat o inclusive growth.

Isa ang bayan ng Sariaya Quezon sa pamumuno ni Mayor Rosauro “Boyet” V. Masilang na nagpapatupad ng proyekto at mga programa, hindi lamang para sa kabataan kundi maging sa kapakinabangan ng mga nakatatanda.

Ngayong taon sa buwan ng Enero, nagsimulang tumanggap ng pagpapa-enrol sa Philhealth ang tanggapan ng Office of the Senior Citizens Affair (OSCA) sa naturang bayan.

Ayon kay Ginang Luisita P. Rena, presidente ng OSCA, daang tao kada araw ang dumadagsa sa kanilang tanggapan upang magpa-enrol (register) sa Philhealth.

May mga senior na wala pang Senior Citizens ID dahil hindi nila alam ang kahalagahan ng pagkuha nito, tulad ng pagkakaroon ng 20% diskwento (discount) sa pagbili ng gamot, pagkain, pamasahe sa mga pampsaherong sasakyan at iba pa, ngunit dahil isa ito sa mga requirements para magkaroon ng Philhealth Membership ay kumuha na rin sila. 

At upang masiguro na matatanggap ng mga nakatatanda ang mga benepisyong para sa kanila, ang mga bagong Senior Citizens na nakuha ng ID ay pinapi-fill-up na rin ng naturang opisina sa Philhealth Form.

Dagdag pa ni Ginang Luisita, ang mga dati ng naghuhulog sa Philhealth ay hindi na dapat mag-alala kapag kumuha ng membership pang Senior, sapagkat ang kanilang mga naihulog na ay naandon pa din at ito ay Lifetime Philhealth Coverage.

Hindi na kailangang magbayad ng Premium kapag senior na, pinahihinto na ito dahil libre na ang membership at lifetime na, kung may mga numero na dati ay yun na rin ang ginagamit.

Binago ang Senior Citizens ID, buo na nakalagay ang pangalan, middle initial at apelyido, kasama na ang araw ng kanilang kapanganakan o birthdate.

Kaya naman hindi na umano natatakot ma-ospital ang mga matatanda, ngayon na sila ay Philhealth Member na.

Para naman sa benepisyo ng mas nakatatanda lalo na ang mga indigent na may edad 77 years old pataas o mga ipinanganak ng mga taong 1930s ay benepisyaryo o makatatanggap sila ng buwanang pension o Social Pension for Indigent Senior Citizens bilang isa sa mga provisions na nakalahad sa Section 5 ng Republic Act 9994 o mas kilalang Expanded Senior Citizens Act of 2010, makakatanggap ng Government Assistance ang mga indigent Senior Citizens o Social Pension Program.

Sa Sec.3 nakasaad na ang “indigent senior citizens” ay pinakamahirap na matatanda na mahina na, may karamdaman o kapansanan, walang pension o wala ng nakukuhang suporta sa pamilya (walang permanenteng source of income) walang kasama sa buhay, mag-isang naninirahan at wala ng ibang maaasahan.

Nagkakahalaga ng limang daang piso (P500.00) ang Monthly Pension na matatanggap ng mga indigent na senior. 

Samantala, ang Life expectancy ng Pilipinong nakatatanda sa ngayon ay 72 years old ang babe at 68 years old ang lalaki, kaya naman mula sa edad 77 ay ibinaba ng edad 65 years old ang age qualification ng indigent senior citizen sector na makatatanggap ng naturang monthly social pension.

Ang mga hindi pa nakakakuha noong nakaraang taon mula January hanggang December 2014 na mga Sariayahing pensioner ay may makukuhang anim na libong piso (P6,000.00) at ngayong taon mula January hanggang May 2015 ay P2,500.00.

Reported by: JEN-JEN OBLEFIAS