ROAD WIDENING AT BRIDGE RE-CONSTRUCTION INUULAN NG REKLAMO AT BATIKOS

Quianuang Bridge

Kaliwa’t kanan ang isinasagawang Bridge Re-construction at Road Widening sa lalawigan ng Quezon ngayon partikular na nga sa bayan ng Sariaya Quezon.

Gilid ng tulay - Quianuang Bridge

Bunsod ito ng pagkakasira ng mga tulay at kakulangan ng espasyo ng mga kalsada.

Maganda man ang layunin ng nasabing proyekto ay hindi pa rin ito nakakalusot sa mga mambabatikos at mga reklamo dahil sa perwisyong dulot nito sa mga drivers at commuters.

Nariyan ang pagbagal ng pag-usad ng mga sasakyan dahil sa one lane lang ang nadadaanan at kung minsan naman ay isinasara ito pansamantala upang ayusin.

Pati ang kawalan ng mga babala at warning lights sa ilang lugar na maaaring magdulot ng kapahamakan lalo na nga’t maulan at maging ang katagalan ng nasabing proyekto ay binabatikos rin.

Reported by: Jen-jen Oblefias

NATIONAL CHILDREN’S MONTH IPINAGDIRIWANG SA PAMAMAGITAN NG PA-SEMINAR NG QPPO

Mula sa mga batas para sa Peace and Order na ipinatutupad sa isang bayan ng ating kapulisan dito sa lalawigan ng Quezon, nariyan rin ang mga aktibidades para sa komunidad at para sa kalikasan.

Ang kampanya tungkol sa illegal drugs, anti-child trafficking, Environmental Protection sa pamamagitan ng Coastal Clean-Up at Mangrove Planting ay isinasagawa.

Samantala sa pagpapatuloy ng Police Community Relations Activity sa mga eskwelahan katuwang ang Local Government Units (LGUs), AFP counterpart at Quezon Provincial Police Office (QPPO), nariyan ang taun-taong selebrasyon ng National Children’s Month na may temang: “Bata Kasali Ka, Ikaw ay Mahalaga”.

Kung saan isang seminar tungkol sa karapatang pambata at ilan pang mga batas na may kaugnayan ang isinasagawa gaya ng RA 7610 (Anti-Child Abuse Law), RA 9208 (Anti-Trafficking in Persons Act of 2003), RA 8353 (Anti-Rape Law), RA 9165 (Comprehensive Dangerous Drugs Act of 2002), Bomb Threat Awareness at iba pa.

Reported by: Jen-jen Oblefias

NAGKAMIT NG BRONZE MEDAL SA TAEKWONDO SA GINANAP NA ASIAN GAMES, ISANG SARIAYAHIN

Hindi nga lamang home of the Generals ang lalawigan ng Quezon kundi isa rin sa mga probinsiya na masasabing may mga atletang nagmumula, yan ang pinatunayan ng isang sariayahin sa ginanap na 17^th Asian Games nitong nakaraang September 19 hanggang October 4 ng taong kasalukuyan.

Isang motorcade ang isinagawa upang bigyang karangalan si Levita Ronna G. Ilao, ang Bronze Medalist sa Taekwondo sa Asian Games na ginanap sa Incheon, South Korea.

Mainit na pagsalubong na may ngiti at katuwaan ang ibinigay ng mga sariayahin kay Rona, makikita rin sa kanyang mukha na hindi man niya nakamit ang Gold o Silver Medal, alam niyang nag-uwi siya ng karangalan para sa kanyang bayan.

CLIMATE WALK MARCHES SINUPORTAHAN NG LGU SARIAYA

Bunsod ng pagbabago ng klima sa ating daigdig o climate change, naaapektuhan ng malaki ang ating kalikasan, pati ang mga hayop at maging ang pamumuhay ng mga tao.

Dahil sa matitinding bagyo na humahagupit na nagdudulot ng matinding pinsala sa atin, maraming grupo mula sa Local Government Units (LGUs), Non-Government Organizations (NGOs) at iba pang pribadong sector ang nagkakaisa at nagsasagawa ng mga aktibidad para sa kanilang adbokasiya sa Climate Change.

Kahapon ay isang Welcome Program for Climate Walk Marches ang isinagawa sa bahagi ng Municipal Park ng Sariaya Quezon.

Nagmula ang nasabing kilusan sa Maynila patungo sa Tacloban na pinangunahan ni Commissioner Nadever M. Saño ng Climate Change Commission.

Ang nasabing aktibidad ay sinuportahan ng LGU Sariaya, Sariaya Tourism Council, Emergency Response Team (ERT) ng MDRRMO, MENRO, UNAKA at Sariaya PNP Personnel.

Reported by: Jen-jen Oblefias

29TH INTERNATIONAL COASTAL CLEAN-UP DAY ISINAGAWA SA COASTAL BARANGAYS NG SARIAYA QUEZON

Isa ang bayan ng Sariaya Quezon sa masasabing makakalikasan at maigting na nagpapatupad ng mga adbokasiya para sa pangangalaga nito

Nakiisa ang iba’t ibang departamento sa isinagawang coastal clean-up nitong nakaraang sabado sa mga baybaying dagat mula Guis-Guis San Roque hanggang Castañas.

Bunsod ito ng ipinagdiriwang na 29^th International Coastal Clean-Up Day.

Sa nasabing paglilinis ay aktibong nakilahok ang mga estudyante, Sariaya Tourism Council at maging ang Sariaya Municipal Police Station.

Reported by: Jen-jen Oblefias