PAG-AALAY AT SANTACRUZAN NAIDAOS NA SA SARIAYA QUEZON

Kada taon kapag sumapit na ang Mayo, asahan na ang kaliwa’t kanang pagdiriwang ng mga Kapistahan na tradisyon na ng mga katoliko.

Tuwing Flores de Mayo may tinatawag na “Alay sa Birhen o Alay kay Maria” bilang debosyon kay Birheng Maria.

Ang bayan ng Sariaya Quezon ay isa lang sa mga bayan sa Pilipinas na may pagdiriwang sa pista at may tinatawag na “Tapusan” o ang pag-aalay ng bulaklak sa Birheng Maria sa buong buwan ng Mayo. Kung saan nagtitipon ang mga mag-aalay sa “tuklong” o kapilya.

Iba’t ibang barangay ang nagsasagawa nito, Isa na dito ang Brgy. Poblacion Singko (5) ng naturang bayan sa ilalim ng pamumuno ni Kapitana Ma. Marivic Villamor.

Ayon kay Kagawad Cynthia Abanador ito ang ikalawang taon ng kanilang ginagawang pag-aalay, natigil umano ito ng sabihin ng pari na sa simbahan na lamang ito gawin, ngunit dahil sa kahilingan na rin ng mga tao, ito ay muling isinagawa noong nakaraang taon sa kanilang barangay mula unang araw hanggang huling araw ng Mayo.

Aniya sinisimulan muna ang pag-aalay sa pamamagitan ng pagro-rosary ng mga bata sa hapon. 

Pinaniniwalaang nagsimula ang tradisyong ito noong 1854 nang iproklama ng Vatican ang doktrina ukol kay Immaculate Concepcion.

Tinatayang 1867 naman nagsimula sa Pilipinas ang Flores de Mayo na debosyon ng mga Katoliko sa mahal na birhen, bilang reyna ng mga bulaklak, kung saan nagkakaroon nga ng pag-aalay ng bulaklak kay Maria sa buong buwan ng Mayo na may kalakip na pagninilay.

Sa isa pang pag-aaral, ayon sa isang Italianong Heswita na si Annibale Dionisi, ang pinakamatandang petsa kung saan naganap ang kahanga-hangang pag-aalay ng mga bulaklak kay Maria ay noong taong 1726 at Mayo ng taong 1784 ng ginanap ito sa siyudad ng Ferrara, Italia.

Bukod sa nabanggit na “Pag-aalay” isa pang debosyon ang isinasagawa pa rin ng mga Sariayahin, ito ang “Santacruzan”. Na ayon sa isang lumang kalendaryo ng Simbahang Katoliko, ang ikatlo ng Mayo ay ipinagdiwang na “Pagkakita o Pagkadiskobre ng Krus na Pinagpakuan (diumano) kay Hesus (Finding of the Cross) ni Emperatris Elena, ang nanay ni Emperador Constantino, na siya namang Emperador ng Roman Empire mula noong taong 312. Ngunit noong 1965, nilimitahan na ang napakaraming pistang ipinagdiriwang. 

Dito may prusisyon kung saan nakasuot ang mga kababaihan ng mga magagarang pormal na damit o gown, na sumasagisag sa "Accolades of Our Lady" na may escort na mga kalalakihan. 

Pero sa prusiyon na ito ay may mga titulo ang bawat sagala. May tinatawag na Reyna Elena, Reyna Emperatriz, Reyna ng mga Propeta at iba pa.  

 

Reported by: JEN-JEN OBLEFIAS

BAYANG MAPAGMALASAKIT PROJECT, HUMIGIT 2,000 SARIAYAHIN NA ANG NATULUNGAN

Bayang Mapagmalasakit Project sa Brgy. Concepcion Pinagbakuran

Upang mas mapalapit sa tao ang pamahalaan, isang proyekto ang inilulunsad ngayon sa bayan ng Sariaya Quezon, sa pangunguna ni Mayor Rosauro “Boyet” V. Masilang.

Sa pamamagitan ng pakikipag-ugnayan sa mga barangay ay naipagkakaloob sa mamamayan ang “Bayang Mapagmalasakit Project”.

Kung saan dito nagkakaroon ng Community Forum, On-Site Delivery of Services at Turn-over of Project Assistance.

Ang mga Serbisyong ibinibigay dito ay Free Registration of Birth, Job Recruitment, Free Medical and Dental Service, Free Haircut (Libreng Gupit), Free Circumcision (Libreng Tuli) at Animal Vaccination.

Anim (6) na sa 43 barangay dito ang nabisita ng Lokal na pamahalaan, kung saan humigit 2,000 na ang natulungan ng iba’t ibang serbisyo na dinala sa mga barangay, gaya ng: Brgy. Mamala I (Kap. Ernesto D. Remo), Brgy. Sampaloc II (Kap. Aristeo M. Ilao), Brgy. Lutucan I (Kap. Juanita Reyes), Brgy. Gibanga (Kap. Mateo R. Nollen Jr.), Brgy. Manggalang Kiling (Kap. Reynaldo C. Malabanan) at Brgy. Concepcion Pinagbakuran (Kap. Pedro C. Manongsong).

Humigit 600 ang natulungan ng Free Medical and Dental Services, nasa 100 mahigit ang nagparehistro sa Free Birth Registration at tumaas ng nasa 538 ang bilang ng nagpagupit matanda man o bata.

Madami rin ang nakapag-patuli sa Free Circumcision Service habang umakyat na rin ang bilang ng pinaturukang hayop sa Free Animal Vaccination.

Bukod sa Libreng Serbisyo (On-Site Delivery of Services), nagkaloob rin ang Sariaya Local Government Units (LGUs) ng First Aid Kit, Spire Board, ilang sako ng Fertilizers (organic and inorganic), packs of groceries at mga pananim na buto o binhi. 

Assorted farm tools ang karagdagang ipinagkaloob sa Brgy. Gibanga habang nabigyan din ng semento at toilet bowls ang Brgy. M. Kiling.

Tig-isangdaan (100) na piraso naman na bakal (rebar) at guyabano seedlings ang naibigay pa sa Brgy. C. Pinagbakuran.

At 150 piraso ng Fruit bearing Trees Seedlings ang ipinamahagi sa Brgy. Mamala I, mga seedlings ng Lansones kung saan, 160 pcs. sa Sampaloc II at 150 pcs. sa Lutucan I ang ibinigay.

Katuwang ng Lokal na pamahalaan ang iba’t ibang grupo sa pagsasa-ayos ng aktibidad na ito, kabilang ang  Local Disaster Risk Reduction and Management Office - Emergency Response Team (LDRRMO-ERT), Sariaya Municipal Police Station, Sariaya Municipal Fire Station, Army (85th Infantry Battalion ng 2nd Infantry Division), Bantay ng Bayan at Kabalikat Civicom (999) Sariaya Chapter.

Asahan na magpapatuloy ang Bayang Mapagmalasakit Project 2015 at madaragdagan pa ang bilang ng mga Sariayahin na matutulungan nito.

Reported by: JEN-JEN OBLEFIAS

AGAWAN FESTIVAL 2015, TAGUMPAY!

Taun-taong inaabangan ang Agawan Festival ng mga Sariayahin at maging ng mga bakasyunista sa bayan ng Sariaya Quezon, na ginaganap tuwing ika-15 ng Mayo.

Isang tradisyon ang agricultural at religious festival na ito na ipinagdiriwang bilang pasasalamat ng mga magsasaka sa kanilang patron na si San Isidro Labrador na katulad ng “Pahiyas Festival” ng Lucban Quezon.

Isinasagawa ang nasabing selebrasyon sa pamamagitan ng isang prusisyon ng imahe ni San Isidro at ng parada.

Ayon kay Ginoong Eric “Kuya Eric” Dedace, PIO ng Sariaya Tourism Council (STC), ang pagdiriwang ng pistang ito ay nagsimula noong taong 1990s habang ang tradisyon ng pasasalamat ng mga Sariayahin sa patron ng magsasaka para sa masaganang ani ay hindi na malaman kung kailan ito nagsimula. Kaya naman ito ay isang matandang tradisyon n­­­­­­a sa kanilang bayan (an age-old tradition).

Ang ruta ng nasabing prusisyon ay may mga makukulay na palamuti sa mga bahay, na karamihan ay agricultural crops o farm produce, gaya ng saging, manga at iba pa na tinatawag ding pabitin.

Sa pamamagitan ng Bagakay (young bamboo branches), mga pinutol na kawayan na didikorasyunan inilalagay o ibinibitin naman ang mga junk food, candies, pamaypay, sombrero at marami pang iba, na sya ring madaraanan ng parada.

Pagdaan ng patron, sinyales na ito sa mga tao na umagaw o agawin na ang lahat ng kanilang makikita na nakabitin, habang ang mga nasa bahay ay naghahagis naman ng kung anu-ano sa mga taong nangangagaw, dito ibabagsak din ang nasabing bagakay. Ito ay tinatawag ding “Happy Pandemonium”.

Pangunahin na ngang makikita sa pagdiriwang na ito ay ang Bamboo, na animo’y Christmas tree na nilalagyan ng mga palamuti, na ayon kay Kuya Eric ay distinguishing charactreristic ng Agawan Festival.

Aniya “Kung makikita ninyo ang kawayan ay pliant, kahit saan dalhin siya ay sumusunod”, ganito umano ang kasaysayan ng Sariaya na nakadaranas ng kalungkutan, sakuna at mga paghihirap pero hindi ibig sabihin ay tapos na ang buhay.

Dagdag pa niya “Kaming mga Sariayahin ay very positive” inihalintulad nya sa kawayan, na hindi magagapi at hindi mawawala.

Bukod pa sa paghahanda ng Lokal na pamahalaan ng bayan ng Sariaya, sa pangunguna ni Mayor Rosauro “Boyet” V. Masilang sa taunang pagdiriwang na ito na naging masaya at matagumpay, dinayo rin ang nabanggit na bayan ng panauhing pandangal mula sa Department of Tourism Region 4, na si Director Rebecca Labit kasama ang mga piling panauhin mula sa Singapore media at mga local media, na sinalubong naman ng Sariaya LGU at Sariaya Tourism Council (STC) sa pamumuno ni Ginang Rowena Z. Masilang.

Layunin ng nasabing pagdalaw ng mga bisita na mapataas ang antas ng pagpapaunlad sa turismo ng Sariaya na nakabatay sa: kabundukan, kapatagan at karagatan (KKK).

Kabalikat Civicom 999 Sariaya Chapter

Ngayong taon nagkaroon rin ng karagdagang aktibidad kung saan nagdaos ng isang Fun Run (RUN sa AGAWAN 2015) na may temang “Unli ang Saya sa Sariaya! Sa Agawan Festival, TaRUN na!”,  ito ay inorganize ng STC sa pakikipag-ugnayan sa Team Arya Sariaya Runners, isang grupo ng mananakbo dito.

 

          Inabangan din ang ikatlong araw, kung saan ang ika-13 ng Mayo ay ang Araw ng Magsasaka, dito rin nagkaroon ng Agri-Tourism Booth at mga palarong pinoy.

Ipinarada rin ang mga naggagandahang kasuotang Buli ng mga kalahok sa ”Sagala ng mga Buling Kasuotan”,  maging ang Bulindakan (Street Dancing)  at Search for Ginoo at Binibining Sariaya 2015  hanggang sa araw ng Agawan  ay inabangan rin.

Kaya naman malaki ang pasasalamat ng lahat ng matapos ng masaya at matagumpay ang taunang Pagdiriwang na ito ng mga Sariayahin.

Reported by: JEN-JEN OBLEFIAS

CONSTRUCTION OF SPILLWAY, ISINASAGAWA SA TUMBAGA 1

Construction of Spillway sa Brgy. Tumbaga 1, Sariaya Quezon

Matagal ng problema sa Brgy. Tumbaga 1 ang baha, lalo na ang pag-apaw ng tubig sa mga spillways dito.

Sa tuwing bubuhos ang ulan at kung may mananalantang bagyo, isa sa problema ng mga taga Tumbaga 1 ay ang kalsada, lalo na kung ang dadaanan nila ay tulay.

Kapag tumataas ang tubig sa mga ilog at umaapaw sa kalsada, hindi makadaan ang mga tao at sasakyan dito.

Kung kaya naman wala silang magawa kundi tahakin ang iba pang ruta na mas malayo ang iikutan patungo sa kanilang mga bahay o di kaya naman ay patungo sa bayan.

Dahil dito isang resolusyon na “Construction of Spillway” sa kanilang lugar, ang inilapit ng Punong Barangay na si Kapitan Renato “Ato” I. Bascoguin, sa kinauukulan. 

Ngayon nga ay ginagawa na ang konstruksyon ng nasabing proyekto.

Sa pakikipanayam ng 97.5 Radio City News Team sa Foreman nito, na si Ginoong Eusebio Bundukin, sinabi niya na sinimulan ang pagsasa-ayos ng spillway noong ika-10 ng Abril, 2015 na inaasahang matatapos sa loob ng limampung (50) araw.

Napag-alamang nasa humigit dalawang milyong piso ang halaga ng naturang construction project ng Department of Public Works and Highways (DPWH).

Ang proyektong ito na bahagi ng Mamala river ay ikalawa na, sa tatlong spillways na sinasa-ayos para sa kapakinabangan ng mga mamamayan dito.

Dagdag pa ni kapitan Ato, isusunod na rin niyang ipa-ayos ang Barangay Road para sa maayos na daan ng kanilang barangay at gayundin naman ang isa pang spillway sa boundary ng Tumbaga 1 at Brgy. Canda.

Reported by: JEN-JEN OBLEFIAS