LIMANG PROGRAMA MAIGTING NA IPINATUTUPAD NG SARIAYA MSWDO

Upang masiguro ang pangangalaga ng bawat sector ng lipunan at maingatan ang mga ito, nagsasagawa ng mga proyekto ar programa para dito.

Isa ang bayan ng Sariaya sa mga bayan ng Lalawigan ng Quezon na nagpapatupad nito sa pangunguna ng tanggapan ng Municipal Social Welfare and Development Office (MSWDO).

Ang limang Pangunahing Programa ay ang Child and Youth Welfare Program, Family and Community Welfare Program, Women Welfare Program, Elderly and Disabled Welfare Program at Emergency Assistance Program.

Reported by: Jen-jen Oblefias

STATISTIC NG VIOLENCE AGAINST WOMEN INILABAS, MGA AHENSYA AT PRIBADONG SEKTOR MAKIKIISA SA PANGANGAMPANYA BILANG SUPORTA

Ayon sa Statistic of Violence Against Women (VAW) ng Philippine Commission on Women (PCW) simula Enero hanggang Disyembre ng nakaraang taon (2013).

Nakapag-dokumento ng umaabot sa 23,806 na kaso ng Violation of Republic Act 9262 (Anti-Violence Against Women and their Children Act of 2004 - VAWC) ang Philippine National Police – Women and Children Protection Center (PNP-WCPC).

76% ng 18,215 VAWC cases ang naresolba ng umabot sa Department of Justice (DOJ) para sa investigation and prosecution noong 2013.

Nasa 9,286 naman ang nadala sa korte, 22% ang nadismissed at 3% (552) ang nasuspinde o ini-refer sa ibang aksyon.

Dahil dito katuwang ng nasabing ahensya ang PNP at ilan pang pribadong sector sa kampanya para matuldukan ang karahasan sa kababaihan at kabataan.

Sa pamamagitan ng pagpapatibay ng Presidential Proclamation No. 1172 at sa nilagdaan ni Pangulong Benigno Aquino III na Republic Act 10398, na nagdedeklara ng Nov. 25 ng bawat taon bilang National Consciousness Day for the Elimination of Violencen Against Women and Children.

Reported by: Jen-jen Oblefias

18-DAY CAMPAIGN TO END VIOLENCE AGAINST WOMEN SISIMULAN NA

Ayon sa statistic on Violence Against Women (VAW), isa sa limang (1 of 5%) babae ay nakararanas ng physical violence simula edad 12 years old at 7%  ang inabuso sa nakalipas na labing dalawang buwan, ayon sa 2013 National Demographic and Health Survey (NDHS).

Dahil dito patuloy na isinasagawa ang pangangampanya para matuldukan na ang pananakit sa mga kababaihan.

Labing walong araw o 18-Days Campaign na sisimulan sa ika-25 ng Nobyembre hanggang ika-12 ng Disyembre taong kasalukuyan ang isasagawa, na may temang: End VAW Now, it’s our Duty”.

Suportado ito ng iba’t ibang grupo at ahensya ng pamahalaan kasama na ang Philippine National Police (PNP), Samahan ng mga kababaihan at marami pang iba.

SARIAYA PULIS NAGSAGAWA NG BARANGAY VISITATION SA DALAWANG BARANGAY

Muling nagsagawa ng barangay visitation ang Sariaya Municipal Police Station  (MPS) sa ilalim ng pamumuno ni Police Supt. Eduard Mallo sa dalawang magkasunod na araw.

Nito lamang nakaraang biyernes at sabado binisita nila ang Brgy. Poblacion 2 at ang Brgy. Antipolo sa bayan ng Sariaya Quezon.

Dito ipinaliwanag at itinuro ang mga bagay tungkol sa Crime, Disaster Reduction at iba pa.

Ganoon din ang iba’t ibang krimen at paano ito maiiwasan at masu-solusyonan lalo na at ang sangkot ay kababaihan at kabataan.

Hinihikayat din ng Sariaya PNP ang lahat ng sariayahin partikular na ang mga taga barangay na ipagbigay-alam sa pamamagitan ng pag text o pagtawag sa PNP Hotline ng kanilang lugar ang mga kahina-hinalang bagay na di normal o kaduda-duda.

Ipina-aalala rin ang mga bagay na ipinagbabawal tulad ng pagkakarera ng mga motorsiklo, sugal, droga at marami pang iba.

SENIOR CITIZEN ASSOCIATION NG SARIAYA NAGHAHANDA NA PARA SA KANILANG CHRISTMAS PARTY SA DISYEMBRE

Naghahanda na ang pamunuan ng Senior Citizen sa bayan ng Sariaya Quezon para sa kanilang General Assembly at Christmas Party sa darating na disyembre.

Dito magkakaroon ng palatuntunan para sa kasiyahan ng nakatatanda na mula sa 43 barangay ng nabanggit na bayan.

Ito ay may temang “Silent Night” kung saan dalawang awiting pamasko ang ihahanda ng mga kalahok.

Ang unang kanta ay pare-pareho at ang ikalawa ay base sa nais nilang awitin o kanilang napili.

May mga judges na magpapasya o maghahatol kung sino ang mananalo sa naturang Singing Contest.

Ang 1^st Prize ay P2,000, ang 2^nd Prize ay P1,500 at ang 3^rd Prize ay P1,000 at may trophy din silang makukuha.

Bukod dito may raffle promo din sa naturang event na gaganapin sa Sariaya Sports Complex sa Dec. 11, 2014.

Sa kasalukuyan, ayon sa presidente  ng Senior Citizen Association na si Ginang Luisita P. Reña, patuloy sa paghahanap ng marami pang sponsors ang kanilang samahan upang madagdagan ang mga premyong pamasko at marami pa ang mabiyayaang Senior Citizen ng kanilang bayan. 

DAHIL SA OPLAN SITA SUSPEK SA DRUGS NATIKLO SA SARIAYA

Sa pagitan ng alas-10:00 ng gabi hanggang alas-4:00 ng madaling araw ang tinatayang “crime clock” o ang oras kung saan ang krimen ay madalas mangyari, base ito sa obserbasyon ng Sariaya Municipal Police Station sa kanilang nasasakupang bayan.

Nito lamang lunes (Nov. 10), ganap na ika-10:00 ng gabi ng matiklo ng Sariaya Pulis ang isang lalaking suspek sa drugs na nakilalang si Ruelito Veloso Torres, 43 anyos, tinder ng isda at residente ng Sitio Dalampasigan, Brgy. Guis-guis Talon, Sariaya Quezon.

Sa pamamagitan ng isinagawang OPLAN: Sita ng mga kapulisan sa nabanggit na bayan, naaretso ang suspek sa Eco-Tourism Road sa kanyang barangay na tinitirhan matapos sitahin habang sakay ng isang Honda XRM na motorsiklo na may plakang 1553 DL.

Habang bine-beripika ang mga kaukulang papeles ng sasakyan ay kinakitaan ito ng tuyong dahon sa kanyang kamay na pinaghihinalaang marijuana at ilang piraso ng lukot na aluminum foil na akma pa nitong itatapon.

Dahil dito agad na dinakip ang lalaki habang ang nakumpiskang ebidensya naman ay kaagad ding dinala sa Crime Laboratory para sa eksaminasyon.

Sa kasalukuyan ay nasa loob na ito ng selda habang nahaharap sa isinampang kaso ng paglabag sa Section II, Article 2 ng RA 9165 (Possession of Dangerous Drugs), kasama na ang pagmamaneho ng walang lisensya.

TOURISM PROGRAM AT BEST PRACTICES NG BAYAN NG SARIAYA QUEZON IPINAGMALAKI NG SARIAYA TOURISM COUNCIL

“Slowly but surely”, ito ang sinabi ng presidente ng Sariaya Tourism Council (STC) na si Ginang Rowena Z. Masilang nang kamustahin ng delegasyon ng LGU Mendez-Nuñez, Cavite, ang turismo sa bayan ng Sariaya Quezon sa ginawang 2-day study tour dito.

Bilang food basket at prime tourist destination na bayan, ipinagmalaki rin ni Executive Assistance Mr. Marion Saligay ang Solid Waste Management ng Sariaya, na isa sa mga best practices dito.

Ang presidente naman ng Sariaya Heritage Council (SHC) na si Mr. Danny De Luna at PIO ng STC na si Ginoong Eric Dedace, ang naglahad ng kwento ng nakaraan o history ng nasabing bayan kung saan tampok ang Kabundukan, Kapatagan at Karagatan (KKK).

Ipinagmalaki rin ang heritage based tourism at eco-tourism, maging ang mga highlights of accomplishments ng nasabing bayan gaya ng Senakulo, Agawan Festival, Pista ng Kabataan, Belen Festival, Trade Fair at conferences na ipini-features sa nasyonal at international media.  

LOKAL NA PAMAHALAAN NG BAYAN NG MENDEZ-NUÑEZ CAVITE NAGSAGAWA NG STUDY TOUR SA BAYAN NG SARIAYA QUEZON

Magkakaroon ng 2 araw na study tour sa bayan ng Sariaya Quezon ang delegasyon ng lokal na pamahalaan ng Mendez-Nuñez Cavite sa pamumuno ni Mayor Fredderick Vida.

Ang nasabing lakbay aral ay sinimulan kahapon sa naturang bayan na pinaghanadaan naman ng Sariaya Tourism Council (STC) sa pangunguna ng Presidente nitong si Ginang Rowena Z. Masilang ang pagdating.

Isang Audio Visual Presentation ang ipinakita ng miyembro ng Sariaya Tourism upang ilahad ang mga ginagawang fiesta at iba pang selebrasyon sa nabanggit na bayan.

Kasama na ang pagpapakita ng mga heritage houses at ilang mga tanawin na makikita sa Kabundukan, Kapatagan at Karagatan (KKK).  

Layunin ng pag-aaral na ito ang makapagbahagi at magkaroon ng kaalaman sa kung ano ang mabubuting pamamaraan sa pagsulong, pagpapa-unlad at pagpapa-ganda ng turismo ng isang bayan.

Reported by: Jen-jen Oblefias

MGA VOLUNTEERS SA HIGHWAY, PATULOY SA PUBLIC SERVICE SA BAYAN NG SARIAYA QUEZON

Sa katatapos na Undas 2014 maraming boluntaryo mula sa iba’t ibang grupo ang patuloy pa rin sa kanilang tungkulin.

Gaya na lamang ng nakatalagang PNP Personnel, Traffic Enforcer at Bantay ng Bayan na nasa kahabaan ng highway sa bayan ng Sariaya Quezon.

Meron o walang okasyon ay patuloy sa kanilang serbisyong publiko ang mga nabanggit, asahan rin ang suporta ng Kabalikat Civicom (Sariaya Chapter) na syang magiging katuwang ng mga nasabing volunteers group at Sariaya Municipal Police Station.

Ito ay bunsod ng trapik na araw-araw na kinakaharap ng mga driver at commuters na dumadaan sa nabanggit na bayan.

Reported by: Jen-jen Oblefias

MGA VOLUNTEERS GROUP HANDANG MAGBIGAY NG SERBISYONG PUBLIKO

Hindi lamang sa undas, maging sa iba pang aktibidad ay handang magbigay ng kanilang oras ang mga grupo na boluntaryo na naki-isa sa pagbabantay simula noong ika-31 ng Oktubre hanggang ika-2 ng Nobyembre.

Maaalalang may mga volunteers mula sa Local Government Units, Kapitan ng mga Barangay, Brgy. Tanod, Brgy. Police, Bantay ng Bayan, Bureau of Fire Protectin (BFP), KABALIKAT CIVICOM, Quezon Reserved Army at marami pang iba ang naglaan ng kanilang oras para umalalay sa mga kababayan natin sa paggunita ng araw ng mga patay at naging katuwang ng mga kapulisan sa pagpapanatili ng Peace and Order at Traffic Management sa kani-kanilang lugar na nasasakupan.

Asahan na sila ay handang magbigay ng kanilang Serbisyong Publiko kapag sila ay kakailanganin ng bayan.

Reported by: Jen-jen Oblefias

TUMBAGA 1 DETOUR ROAD APEKTADO NG PAG-ULAN SA SARIAYA QUEZON

Malubak, maalikabok at maputik kapag umuulan, yan ang karaniwang naririnig sa mga pasahero at drivers na dumadaan sa kalsada patungo at paglabas ng Tumbaga Detour Road.

Dahil sa pag-ulan sa mga nakalipas na araw sa bayan ng Sariaya Quezon lalo pa nitong pinahirapan ang mga bumabyahe dito.

Bagama’t naiibsan ang alikabok kapag nababasa ang naturang kalsada, lumalambot naman ito.

Bukod sa bitak-bitak na ang mga sementadong daan, ang mga lupa pa ang kalsada ay kapansin-pansin ang paglambot at ang paglalim dahil sa sunod-sunod at maya’t mayang nagugulungan o nadadaanan ng mga gulong ng mabibigat na sasakyan (heavy vehicles).

Ika nga ng mga tao maaari ng pagtampisawan ng mga bata ang mga ukab ng kalsada kapag umuulan dahil sa mala mini pool na ang itsura nito.

Kaya naman pinag-iingat ang mga dumadaan dito lalo na at naka-motor

Reported by: Jen-jen Oblefias

QUEZON RESERVED ARMY MAKIKIISA SA PAGBABANTAY SA UNDAS

Bukod sa mga boluntaryo mula sa iba’t ibang grupo at ahensya magiging katuwang rin ng Quezon Provincial Police ang Quezon Reserved Army sa darating na undas.

Kasama ang ilan pang mga volunteers mula sa Bantay ng Bayan, Brgy. Tanod, Philippine Guardian Brotherhood (PGBI), Police Hotline Movement Inc. (PHMI), Philippine Anti-Crime Org. International Inc., Kabalikat Civicom, mga Medical Personnel mula sa City Health Office at mga First Aiders.

Matatandaang aktibo ring nakilahok nitong nakaraang taon ang mga reservist sa pagbabantay noong undas 2013.

Sa ngayon ay isang grupo ang ilalagay sa Pagbilao Quezon at ang isa ay sa Lucena City.

Hahatiin ito sa mga designated areas tulad ng Motorist Assistance Center (MAC), Public Assistance Center (PAC), loob at labas ng sementeryo, pagsasa-ayos ng trapiko (traffic management) at pagpapanatili ng Peace and Order katuwang ng kapulisan sa nasabing araw.

Reported by: Jen-jen Oblefias

QUEZON PULIS NAGBIGAY NG TIPS UPANG MAKAIWAS SA KRIMEN AT SAKUNA SA UNDAS

Nagbigay ng tips at ilang paala-ala ang mga kapulisan upang maka-iwas sa krimen o anumang sakuna sa paggunita ng araw ng mga patay.

Sa araw ng Undas at sa pagdalaw sa sementeryo dapat tandaan ang mga sumusunod:

I.              Kung iiwanang walang bantay sa bahay

ü  Dapat ikandado ang pinto at bintana, tiyakin na walang dadaanan ang sinumang magtatangkang magnakaw, mainam na maglagay ng alarm para maalerto ang mga kapitbahay

ü  Ipagbilin sa pinagkakatiwalaang kapitbahay ang inyong bahay at ipaalam kung kalian kayo babalik.

ü  Tiyakin din na walang naiwan na nakasinding kandila, bukas na electric o gas stove, tumutulong tubig ng gripo o naka-plug na appliances.

ü  Iligpit ang anumang mahalagang bagay o pag-aari sa labas ng bahay na maaaring nakawin tulad ng mga damit sa sampayan, bisikleta o sasakyan.

II.            Kung magbibyahe naman at magdadala ng sariling sasakyan

ü  Tiyakin na maayos at walang problema ito bago bumyahe

ü  Tandaan ang BLOWBAG (Battery, Light, Oil, Water, Brakes, Air, Gas)

ü  Dapat kumpleto ang mga dokumento at papeles na dala

ü  Tiyakin na naka-safety lock ang mga pinto at binatana ng sasakyan

ü  Sa pagmamaneho tiyakin na laging kontrolado ito, iwasan ang one hand driving o paggamit ng cellphone

ü  Huwag magmaneho ng naka-inom.

III.           Kung gagamit ng Pampublikong Sasakyan

ü  Iwasan ang pagsu-suot ng mga mamahaling alahas, pagdadala ng malaking halaga ng pera at maraming gamit para maiwasan ang pagkawala ng mga ito at para hindi mahirapan sa byahe.

ü    Ingatan ang mga cellphone at appliances na malimit dalhin tuwing undas

ü  Mainam na maging maaga sa istasyon ng sasakyan sa terminal, pier o paliparan upang maiwasan ang siksikan at makakuha ng maayos na pwesto lalo na para sa kababaihan, bata at senior citizen

ü  Kung may napapansin na kahina-hinala sa paligid o kaduda-dudang kilos ng tao, palihim na ipaalam ito sa kina-uukulan.

ü   Mag-ingat sa mga mandurukot.

ü  May mga nakatalagang Police Assistance Post sa mga istasyon, pier o paliparan na maaaring pagsumbungan.

IV.          Kapag nasa loob  ng sementeryo

o   Magdala ng sapat na pagkain at tubig inumin. Magdala rin ng pananggalang sa init at ulan.

o Bawal ang alak, pagdadala ng mga deadly o bladed weapons, mga malalakas sa loud speakers at mga gamit pang-sugal.

o  Bantayan ang mga gamit, payuhan ang mga kasamang bata na huwag pagala-gala

o    Tiyakin na ang sinindihang kandila ay di makakalikha ng sakuna o sunog

o    Panatilihing malinis ang kapaligiran, magdala ng sariling trash bag.

o   Dapat ring alamin ang lugar ng First Aid Station at PNP Assistance Booth para sa emergency o police assistance at

o     Kung maglalamay tiyakin na ang kapaligiran ay ligtas sa krimen at sakuna.

Reported by: Jen-jen Oblefias

KARAPATANG PAMBATA PINAHAHALAGAHAN NG QUEZON PROVINCIAL POLICE

Dahil sa pagtaas ng bilang ng kaso ng rape incident sa probinsya ng Quezon, mas pinaiigting ng Quezon Provincial Police ang pagpapatupad ng mga batas para sa mga karapatang pambata tulad ng Republic Act No. 10175 na mas kilalang Cybercrime Prevention Act of 2012 at ang Anti-Child Pornography Act (RA 9775) na nasa ilalim ng RA 7610. Layunin nito na maproteksyonan ang mga karapatang pambata.

Ilan ito sa mga tinalakay sa seminar ng 22^nd National Children’s Month na may temang “Bata Kasali Ka, Ikaw ay Mahalaga”.

Ang aktibidad na ito ay sinusuportahan at isinasagawa ng Quezon Provincial Police katuwang ang Local Government Units ng mga bayan at munisipalidad sa Lalawigan ng Quezon.

Reported by: Jen-jen Oblefias

IBA’T IBANG AHENSYA AT GRUPO HANDA NA SA DARATING NA UNDAS

Isang linggo bago ang undas, sinimulan na ng Quezon Provincial Police ang pagpaplano sa re-routing at deployment ng mga tauhan nila katuwang ang ilang ahensya o grupo sa Public Assistance Center (PAC) at Motorist Assistance Center (MAC).

Ang Oplan Kaluluwa 2014 ng kapulisan ay layuning magkaroon ng kaayusan, gaya ng pagkakaroon ng traffic management and control, re-routing of vehicles, parking areas at Loading and Unloading Zone.

Bukod sa kapulisan nariyan rin ang mga boluntaryo mula sa Kabalikat Civicom.

Reported by: Jen-jen Oblefias

MGA MAMAMAYANG NAKATIRA MALAPIT SA DETOUR ROAD SA SARIAYA QUEZON DUMADAING NA RIN

Sariaya Quezon – Hindi lang ang usad pagong at katagalan ng trapik ang inirereklamo, bukod sa daing ng commuters at drivers sa layo ng detour road at lubak sa kalsada, maging ang mga taong naninirahan doon ay dumadaing na rin.

Sa bahagi ng Brgy. Tumbaga 1, kapansin-pansin na ang pagkasira ng kalsada dahil sa dami ng mabibigat na sasakyan na dumadaan.

Hindi lang ang alikabok ang pumupulbos sa mga mukha ng mga kababayan natin doon kundi pati na rin ang maitim na usok na nagmumula sa tambutsyo ng ilang sasakyan.

Ganito ang scenario sa Mamala 2, takot din sa mga magulang ang namamayani lalo na at may mga bata na maaaring madisgrasya sa naturang lugar. 

Nagbabadya pa ang pagkasira ng maliit na tulay dito, may lumalambot din na bahagi ng lupa kapag nababasa ng ulan.

Maging ang mga tricycle driver humihina na rin ang pasada, dahil ang mga mananakay doon ay hindi na napunta sa kahabaan ng maharlika highway upang sumakay ng jeep o bus dahil mismong sa lugar na nila na-ikot ang mga sasakyan.

Reported by: Jen-jen Oblefias

TUMBAGA 1 DETOUR ROAD (Pictures)

Brgy. Tumbaga 1, Sariaya Quezon

         Inside the Detour Road

    

Photos by: Jen-jen Oblefias

MGA ANCESTRAL HOUSE AT LUMANG GUSALI, MAAAPEKTUHAN NG ROAD WIDENING SA BAYAN NG SARIAYA QUEZON

“Protektahan ang mga lumang bahay at istraktura sa bayan ng Sariaya Quezon”, yaan ang panawagan at gustong mangyari ng mga sariayahin na manatili ang mga pamana ng sinaunang henerasyon.

Kaya naman sa isinasagawang road widening sa naturang bayan, pinangangambahan ang pagkasira ng mga ancestral houses at iba pang lumang gusali.

Ilan sa mga ito ay ang Don Natalio-Enriquez Ancestral House na ginawa noong 1931 ng arkitektong si Andres Luna De San Pedro, anak ng dakilang pintor na si Juan Luna. May 14, 2008 ng idineklara itong heritage house ng National Historical Institute.

Maging ang heritage park at ang munisipyo ng Sariaya na itinayo noong 1931 at ang Patio ng St. Francis of Assisi Church na nasa tapat nito na noong 1748 pa nakatatag dito ay nanganganib ring masira.

Una na ngang natamaan ang pampublikong sementeryo dito na tinatayang nasa isang daan (100) taon na.

Hindi rin nakaligtas ang heritage kalachuchi tree na ayon sa pagsasaliksik ng sariaya heritage institute ay piping saksi sa mga nangyaring digmaan.


Reported by: Jen-jen Oblefias

MGA KATANGIAN UPANG MATAMO NG LGU ANG SEAL OF GOOD LOCAL GOVERNANCE, INILAHAD NI LUCENA CITY COUNCILOR BRIZUELA

Sa prebilehiyong pananalita ni Lucena Councilor Benny J. Brizuela sa ginanap na sesyon sa Sangguniang Panglunsod ng Lucena kamakailan ay kanyang sinabi, na ang kahusayan sa paggamit ng pondo, pagsunod sa regulasyon ng paggamit nito at maging ang pagiging transparent ng local government unit ay hindi sapat upang matamo ng isang lokal na pamahalaan ang tinatawag na Seal of Good Local Governance (SGLG).

Aniya higit na mahalagang maipamalas ang mahusay na performance sa iba pang areas na direktang nakikinabang ang mga mamamayan.

Ang mga katangian na dapat maipasa ng isang LGU na gagawaran ng SGLG ay tatlong bagay, una na nga ang Good Financial Housekeeping o maayos na pananalapi, ikalawa ang Disaster Preparedness o paghahanda sa sakuna at ikatlo ang Social Protection o sensitibo sa sektor na mas higit na nangangailangan, tulad ng katutubo, may kapansanan, kabataan at iba pa.

Bukod pa dito kailangan din na maipamalas, kahit isa sa mga katangian gaya ng Business-Friendliness and Competitiveness o bukas na pamumuhunan para sa pagdami ng negosyo at trabaho, okaya naman ay Peace and Order o pagpapanatili ng ligtas at mapayapang pamayanan at panghuli ang Environmental Management o pangangalaga sa kalinisan at kapaligiran.



Reported by: Jen-jen Oblefias

LUCENA CITY COUNCILOR NOCHE NAGPA-ALALA SA MGA SAKIT NGAYONG KAPASKUHAN

Ngayong pumasok na nga ang Christmas Season, isang mahalaga at napapanahong paalala na ang mga pagkaing inihahanda sa mga Christmas parties, Noche Buena at Media Noche ay mayaman sa cholesterol na nagdudulot ng “Highblood Pressure”.

Kaya naman sa prebilehiyong pananalita ni Lucena City Councilor William Noche sa ginanap na sesyon sa Sangguniang Panglunsod ng Lucena, sinabi niya na isa sa kanilang tungkulin ang magbigay ng impormasyon, babala o paalala sa tao.

Aniya ang Local Government Code ay nagtatadhana na ang mga lokal na pamahalaan ay mag-provide ng health services.

Sa pagtatapos ni Noche kanya ring sinabi na ang mga impormasyong medikal na kanyang nabanggit ay mula sa pagsasaliksik ng representasyon na ang tanging hangad ay ibigay lamang ang kaunting kaalaman at mabuting sumangguni sa mga Health Professionals para sa mas malawak na pang-unawa.


Reported by: Jen-jen Oblefias

ELDERLY MONTH IPINAGDIRIWANG NGAYONG BUWAN NG OKTUBRE

Kung meron nga tayong selebrasyon para sa ating mga kabataan, meron din naman tayong “Elderly Month Celebration” sa buwang ito ng Oktubre.

Isa ang grupo ng Senior Citizens Federation ng bayan ng Sariaya Quezon, na masiglang nagdaraos taun-taon ng ganitong programa na nagmula sa 43 barangay kung saan may mga panauhing pandangal mula sa Punong Bayan, Municipal DSWDO at iba pa.

Kamakailan nga lamang ay ipinagdiwang ng mga lolo at lola ang Senior Citizen’s Week na may temang: “Ang Nakakatanda ay yaman, katuwang sa pag-unlad ng bayan kaya’t dapat pangalagaan kanilang kapakanan.”

Dito nagkakaroon ng Pampasiglang Bilang, Paligsahan ng Sayaw at Paggawad ng Gantimpala sa mananalong kalahok na sya namang kinasasabikan ng mga nakatatanda.


Reported by: Jen-jen Oblefias

SARIAYA HERITAGE APEKTADO NG ROAD WIDENING

Bukod sa trapik sa kahabaan ng Sariaya road na nararanasan simula ng gawin ang tulay ng Quianuang Bridge at road widening, namimiligro rin ang mga heritage houses sa bayan ng Sariaya Quezon.

Ito ang malaking isyu ngayon na pinag-uusapan ng mga sariayahin at maging sa social media ay binabatikos.

Ayon sa ilan, hindi dapat binabago ang istraktura ng mga lumang establisyemento o lumang gusali dahil ito ang nagpapa-alala ng kasaysayan na nakikita ng mga sariayahin maging ang mga nagpupunta dito.

Pati ang mga mananakay o bumabyahe na dumaraan sa bayang nabanggit.

Ika nga ng ilan "Ang pagbabago ay bahagi ng pag-unlad pero maaaring umunlad ng hindi binubura ang mga palatandaan ng mga nakalipas na panahon".

Ito rin ang pananaw ng Presidente ng Sariaya Heritage Council (SHC) na si Ginoong Danny De Luna, aniya "Sana maliwanagan ang mga kababayan natin kung ano ang kahalagahan ng mga pamana ng lahi sa ating kultura at katauhan bilang Pilipino".

Reported by: Jen-jen Oblefias

ROAD WIDENING AT BRIDGE RE-CONSTRUCTION INUULAN NG REKLAMO AT BATIKOS

Quianuang Bridge

Kaliwa’t kanan ang isinasagawang Bridge Re-construction at Road Widening sa lalawigan ng Quezon ngayon partikular na nga sa bayan ng Sariaya Quezon.

Gilid ng tulay - Quianuang Bridge

Bunsod ito ng pagkakasira ng mga tulay at kakulangan ng espasyo ng mga kalsada.

Maganda man ang layunin ng nasabing proyekto ay hindi pa rin ito nakakalusot sa mga mambabatikos at mga reklamo dahil sa perwisyong dulot nito sa mga drivers at commuters.

Nariyan ang pagbagal ng pag-usad ng mga sasakyan dahil sa one lane lang ang nadadaanan at kung minsan naman ay isinasara ito pansamantala upang ayusin.

Pati ang kawalan ng mga babala at warning lights sa ilang lugar na maaaring magdulot ng kapahamakan lalo na nga’t maulan at maging ang katagalan ng nasabing proyekto ay binabatikos rin.

Reported by: Jen-jen Oblefias